- 439 -

1409. März 23. Liegnitz.

Herzog Wenzel, Bischof zu Breslau, giebt der Stadt Liegnitz das Privilegium, dass innerhalb einer Meile kein Kretscham stehen soll.

In gotis namen amen. Wir Wenczlaw von gotis genaden bischoff czu Breslaw, in Slesien herczog vnd herre czu Legnicz bekennen offintlich vnd ewiklich mit disem brife allen den, dy en sehen adir horen lesen, das vor vns komen sein vnsir ratmanne vnd eldisten vnsir stat Legnicz von der stat wegen mit redlicher gewissen, wy das sy von aldirs von vnsern eidern vnd vorfarn herczogen vnd herren czu Legnicz sulche gnade vnd freyunge gehabt haben, das bynnen einer meylen von der stad Legnicz kein kretschem sein nach steen sulde, des haben wir angesehen ir redliche gewissen vnd haben vnsern ratmannen, eldisten, gesworen vnd der ganczen gemeinde vnsir stat Legnicz, dy do yczunt sein vnd noch hernoch sein werden, gegeben vnd geben, gelehen vnd lihen vnd reichen in mit crafft dises briues sulche gnade vnd freyheit, das bynnen einer meyle von vnsir stat Legnicz kein kretschem von newes gebawet noch gesaczt sulle werdin, man habe denne das von aldirs gehabit vnd von rechte. Des czu ewiger sicherheit vnd vrkunde haben wir en desen briff mit vnserm grosen ingesigel mit vnserm signet hindene angedrukt lassen vorsigeln czu Legnicz nach gotis geburt vnsirs liben herren virczenhundirt jar darnach ym newnden jare am sonnobende vor dem suntage, als man in der heiligen kirchen Judica singet. Dobey sint gewest vnser getrawen her Hannos Czedelicz von Parchewicz, Heinrich Falkenhayn, Hannos Rotkirche der eldiste, Peter von Guske, Hannos Gawen, Nytsche Vngerathen vnd meister Petir Adolphi vnser techand czu Legnicz vnser canceller, dem wir desen briff befulen.

Bitschens Privilegb. f. CIX.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866